TKRN Toolkit Bislama

tk-reite-notebook-logo-test-small-web

TK Reite Notebooks hemi olsem wan tul we yu save yusum blong raetem o rikodem ol kastom save blong yu mo blong pasem igo long ol fiuja jeneresen. Hemi rispektem desisen blong wan wan man mo woman long wanem hemi wantem raetem. Tul ia hemi usum ol masin blong tedei mo pepa.

Hemi no usum bigfala mani, hemi isi nomo blong usum mo yu save arenjem blong mekem se hemi fitim ol difdifren komuniti mo lanwis. Tul ia oli bin disaenem wetem ol man long vilij blong Reite long Papua Niu kini wetem sapot blong Christensen Fund.

Versions : English | Tok Pisin | Bislama

Yu save kasem ol didifren paten blong Notbuk long PDF fomat long ples ia

Igat tri pat blong hao blong wok wetem Notbuk ia:

Fes wan hemi: Hao blong statem wok; sekon wan hemi: Hao blong givimaot wok blong you long narafala man & mo namba tri hemi ol teknikol skil we yu save yusum blong mekem mo finisim notbuk ia.

BLONG STATEM WOK

Ol tul we yu nidim:

    • Yu nidim pen, paper mo sisis blong statem.
    • Yu nidim komputa, Akses long intanet mo wan printa blong sevem mo printim aot notbuk blong yu. (yu save lukluk long pat we hemi tokbaot ol teknikol skil blong kasem mo save).
Wanem blong mekem: Risen from wanem yu mekem?
1. Selektem ol man o woman we bae yu wok wetem mo tok aroan long ol difdifren kastom save we oli save raetem daon long notbuk ia. Tokabaot wanem oli wantem raetem daon mo wanem nao yus blong hem. Tulkit ia hemi sapotem olgeta we oli intres blong lukaotem mo kipim gud kastom save blong olgeta blong mekem se fiuja jeneresen i save luk. Hemi blong olgeta blong oli disaed hao oli wantem yusum. Sapose yu stap wok tugeta wetem wan komuniti o wan grup, hemi inpoten blong yufala imas agri long ol basik samting olsem ‘who nao bae i tekem pat, ‘bae who nao i benefit long hem’, ‘Who bae hemi kontrolem mo lukaotem taem ifinis.
2. Mekem i klia long ol pipol se hemi stap long wan wan man blong tekem part and igat ol wei blong blokem ol narafala man blong oli no luk ol infomesen blong yu sapose yu no wandem se bae oli luk. (yu save usum consent model we ol vilij pipol blong Reite oli bin mekemap). Hemi inpoten se everiwan we oli tekem pat long woksop ia oli andastandem mo oli gat janis blong luk save se:

a. Hemi wan folentia wok
b. From wanem nao oli wokem mo wanem nao aotkam blong hem
c. Oli no pem man blong tekem pat mo bae yu o narafala man bae ino save mekem mani lo ol resal blong hem
d. Igat ol wei tru long proses we hemi alaowem ol patisipens blong blokem sam infomesen blong olgeta sapos oli no wantem narafala man i luk.

3. Yu save jusum ol sambol blong ol notbuk we oli stap long ples ia o yu save mekem up wab blong yu. Ol sambol blong ol notbuk ia oli stap long Inglis lanwis, Bislama mo Tok pisin.
Ol sambols ia oli stap difren saes mo oli yus blong rikodem eni samting we yu tink se hemi gat valiu. Oli gat ol difren gaed laen tu we oli redi istap blong yu folem.Yu jusum nomo hamas yu nidim blong yusum. Mo yu save usum bookleteer, tu blong mekem ap wan notbuk blong yu wan long ol diferen lanwis blong ol difdifren kaen topik o wetem ol difdifren komuniti.
4. Printim aot namba blong ol notbuk we yu tink se bae yu usum.
Yu save usum wotapruv pepa long ples blong standed ofis pepa folem weta mo ol material we hemi avaelebol istap.
Kipim ol pepa blong yu long oda olsem taem we hemi kamaot long printa.
Mekem sua se igat sesis blong ol patisipen oli yusum blong mekem ol notbuk ia.
Stampa tinktink hemi hao blong yusum notbuk ia. Ol pipol oli save yusum blong raetem taon eni samting we oli wantem.
Wota pruv pepa (olsem Aquascribe) hemi save stap long taem long ol kaen weta olsem istap rain mo sun oltaem.
Taem yu sevem wok blong yu igo long komputa, yu sevem long wan fomat oli singaotem PDF. Mo taem yu printimaot, ol pepa istap long stret oda nomo. Sapose yu mixim ol pepa blong yu olbaot bambae yu no save foldem gud notbuk blong yu.
sisis hemi yusful taem yu stap putum tugeta ol pepa we yu printim aot blong yu mekem notbuk blong yu.
5. Arenjem ol miting long pablik o yu save holem wan praevet toktok wetem ol pipol we bae oli tekem part blong sowem long olgeta hao blong mekem mo foldem ol notbuk ia.
Tokbaot hao nao bae oli save yusum notbuk ia mo ol difren kaen topik we bae oli wantem putum insaed long notbuk ia.
Blong mekem se ol pipol oli harem save hao blong yusum notbuk ia blong raetem, drowem ademap sam narafala infomesen igo insaed.
Yu save mekem ol pipol oli lukluk ol narafala notbuk we ol narafala man o komuniti oli bin mekem finis.
Hemi inpoten tumas blong wan wan man i mekem notbuk blong hem wan nomo.
Taem yu lanem hao blong mekem ol notbuk ia yu wan bambae intres blong yu bae istap long projek ia mo bae yu filim se yu lanem mo winim wan gudfala samting.olgeta we oli save finis hao blong foldem ol notbuk oli save lanem ol narafala man mo givhan lo taem blong ol woksop.
Ol patisipen oli sud jusum ol topik blong olgeta blong putum igo insaed long notbuk.
Ol miting bae oli givim janis long ol pipol blong wok tugeta mo jusum wan gudfala topik blong raetem daon long notbuk mo tu blong putum gud plan blong finisim buk blong olgeta.
Mo hemi helpem wan wan man blong kontrolem projek blong hem wan.
Fasin blong wok tugeta hemi givim janis blong yu save ol narafala man mo ol tinktink blong olgeta long saed blong ol kastom save blong olgeta.
Ol miting oli givim janis too blong harem tinktink blong narafala man blong mekem se inogat raorao long wanem blong raetem long notbuk.Ol samting blong tinkbaot se:
Notbuk ia oli mekem blong who i luk?
Whu bae i luk olgeta taem oli stap mekem?
Wanem nao oli luk fowod blong winim?
6. Taem blong mekem notbuk blong yu ikam rili blong yu. Tekem pija blong wan wan patisipen o wan grup we oli bin fulumap notbuk. Printim aot pija ia mo putum long foret blong buk. Askem olgeta blong raetem nem blong olgeta long stret ples. Pija ia hemi blong sowem se notbuk ia hemi blong whu. Mo whu nao ibin raetem. Mo blong mekem tu se ol patisipen oli glad blong finisim wok blong olgeta.
Pija ia tu iblong sowem long ol man se wanem istap insaed long buk ia hemi join wetem pija ia blong mekem se kastom save ia hemi stap wetem man ia.
7. Askem olgeta sapose oli wantem karemaot sam toktok long saed blong who nao oli givim raet long hem blong lukluk not buk blong olgeta. Mekem sua se oli harem save mo glad long ol toktok ia.
8. Mekem sua se ol man we oli patisipet long wokshop oli gat ol tul blong raet mo dro long hem.Givimaot ol tul ia sapose oli nogat. Ol toktok blong givim raet long ol man blong lukluk buk blong olgeta hemi wan wei blong mekem olgeta oli tinktink gud long wanem bae oli raetem doan. Toktok ia istap askem ol patisepen blo givim raet long ol man we oli wandem blo oli luk buk blong olgeta.
Hemia hemi inpoten from se hemi mekem se yu gat kontrol long wanem bae yu raetem daon, mo whu nao bae i save luk bifo yu putum igo long pablik.
Yu mas toktok gud long ol partisipen se oli stap wokem buk ia blong olgeta nomo mo ol fiuja jeneresen blong olgeta we oli wandem pasem ol kastom save blong olgeta igo long ol.
Mekem i klia tu se sapose oli no wantem ol man blong luk luk buk blong olgeta, oli save blokem gud from se wanem oli raetem hemi blong olgeta nomo. Be sapose oli wantem oli save givim raet long samfala man blong luk.
9. Toktok gud wetem ol patisipen blong oli fulumap gud ol spes insaed long ol notbuk wetem ol toktok mo ol pija blong sowem gud wanem nao oli stap tokbaot. Ol man oli save tink nating long ol stampa tinktink long saed blong kastom save blong olgeta. Mo oli stap tink se everi man oli save wanem oli wandem tokbaot.
Askem long olgeta wanem oli wandem blong ol fiuja jeneresen blong olgeta oli save sapose oli neva gat janis blong go long aelan o vilij blong olgeta.
Sapose wan man hemi neva save wan tri or wan wud mo ol yus blong hem. Yu mas givim plante toktok long saed lo tri o wud ia blong mekem se man ia i harem save mo luk save wanem yu stap talem mo folem gud toktok we yu stap raetem taon.
10.Kam antap wetem wan tinktink long wan deit o taem we bambae ol patisipen oli mas karem bak notbuk blong olgeta taem we oli finisim blong mekem kopi igo long komputa sapose hemi nid. Hemia istap givim strong tinktink long ol patisipen blong finisim buk blong olgeta. Samfala bae oli intres blong wokem plante notbuk. Samfala bae oli sem long wok blong olgeta mo bae oli nidim longfala taem lelepet blong finisim gud buk blong olgeta.
11. Mekem hemi isi long ol man blong oli save askem ol kwestin mo givim tinktink blong olgeta taem oli stap fulumap ol notbuk. Sapotem ol tinktink blong olgeta long wanem oli wantem rikodem insaed long notbuk blong olgeta. Taem yu no sapotem gud ol patisipen long taem blong woksop, bambae i save mekem olgeta i lusum intres mo samfala bae oli sem blong tokbaot ol simbol samting.
Blong tekem part insaed long projek ia hemi save kam moa inpoten bitim wanem we oli rikodem long buk.
12. Taem yu finisim buk blong yu, yu save putum igo insaed long komputa tru long wan masin oli singaotem skana (Scanner).
Be jekem gud sapose man we i raetem notbuk hemi agri blong putum kopi blong wok blong hem igo insaed long komputa.
Sapose oli agri, yu save karemaot notbuk ia bagegen blong mekem kopi o skanem wan wan pej mo sevem long komputa long PDF format.
Givim wan nem blong yu luk save.
Taem yu sevem notbuk blong yu long komputa, hemi save stap long taem mo semtaem yu save pasem aot long ol narafala man blong luk mo yu save printim aot wan narafala kopi sapose hemia we yu mekem i lus or inogud.
Yu save statem wan laebri blong ol kastom save mo praktis.
13. Putum bak not buk bagegen mo givim igo bak long stret man blong hem. Taem yu givim notbuk long stret man blong hem, hemi inpoten tumas from se olgeta oli mas kipim gud ol buk blong olgeta mo oli save trastem yu.

HAO BLONG GIVIMAOT WOK BLONG YU IGO LONG NARAFELA MAN

14. Yu save yusum ol niufala fasin blong ol waet man blong givim aot ol infomesen blong yu. Hemia oli singaotem ol USB flash drive, mo ol memori kad olsem micro SD card. Mo yu save mekem i smol enaf blong sendem long email.

15. Sapose yu stap gat akses long intanet oltaem, yu save mekem up wan websaet we bae hemi save lukaotem ol wok we yu sevem igo long komputa. Visitim onlaen laebri websaet blong ol vilij pipol blong Reite blong givim yu mo save long hao blong mekem ap wan websaet blong yu wan.
Yu save mekem websaet blong yu i open long eni man i save luk o yu save mekem se hemi praevet blong yu wan nomo.

16. Printim aot ol kopi blong ol not buk we yu sevem igo long komputa. Foldemap olgeta blong yu save statem wan laebri wetem ol kopi blong ol not buk ia. Laebri ia i save stap insaed long wan skul, wan komuniti senta or wan sosaeti o oganaesesen.

OL TEKNIKOL SKIL WE YU SAVE YUSUM BLONG MEKEM MO FINISIM NOTBUK

Projek ia hemi yusum nomo wanem we hemi avaelebol olsem ol masin mo pepa. Ol stamba tul blong yusum hemi ol pen, pepa mo sesis wetem difdifren masin we oli save givhan blong mekem wok i kwik mo luk gud taem i finis:

  • Ol pen
  • Sisis
  • Printa
  • Skana
  • Komputa
  • Akses long intanet
  • Digital camera/camera long ol mobael fone
  • Poket foto printa mo foto pepa
  • USB flash draev/SD cad

Blong statem wan niufela notbuk

Yu save yusum pen mo pepa nomo blong mekem wan niufala notbuk – Mifala istap wok long hem iet mo bambae mifala i putum aot long intanet ino long taem, taem hemi finis.
Blo printim ol notbuk yu nidim wan gudfala komputa (desktop o laptop: windows, MacOS o Linux etc) wetem akses long intanet. Bae yu yusum wan sofwea long komputa blong organisen gud ol toktok long notbuk blong yu olsem Microsoft word mo Open/Libre office writer. Hemia bae yu sevem igo long komputa olsem wan PDF file we bae yu putum igo long intanet long wan platfom onlaen we bae yu save yusum blong mekem wan notbuk blong yu we Proboscis kampani nao i sapotem. bookleteer.com bae i givimaot stret PDF file fomat blong notbuk blong yu we yu save daonlodem. Yu save luk onlaen long intanet mo yu save printim aot.

Blong mekem wan notbuk
Yu nidim wan gudfala Inkjet or laser printa blong printim aot ol PDF files blong notbuk blong yu. Yu nidim wan sesis nomo blong katem ol lif pepa blong yu mo foldem ap. Yu save lukluk ol video we i showem hao blong mekem ap wan notbuk: lukluk ol video.

Ol pepa
Long tropikol klaemet blong Papua Niu Gini, Mifala i yusum tugeta standed A4 ofis pepa mo Aquascribe(wan kaen wotapruv pepa) blong printim aot mo mekem ol notbuk. Ol semsemak wota pruv pepa oli avaelebol long ol bukstoa olbaot. Ol pepa ia oli gud long kaen weta we istap kat ren mo san oltaem. Taem ol pepa ia oli toti yu save klinim isi nomo mo bae yu no save spoilem ol raeting long pepa. Be yu save yusum normal ofis pepa ia nomo.

Blong putum ol pija o foto
Igat fulap fasin blong putum ol pija o foto igo insaed long notbuk blong yu: Yu save printim ol foto we yu tekem long camera o fone blong yu long wan ofis pepa, Katemaot mo putum glu long hem mo putum igo insaed long notbuk blong yu. O yu save yusum wan spesel foto printa olsem Polaroid Zip (oli bin singaotem PoGo) mo LG Pocket Photo printa blong printim aot bisnis saes foto (we igat glue long bak blong foto). Ol foto ia bae oli kamaot daerek long camera o mobael fone blong yu. Polaroid printa hemi wan printa we yu save konektem mobael fone o camera blong yu daerek long hem mo printim ol foto.
Mifala i advaesem yu blong yusum ol spesel foto printa blong printim aot ol foto blong ol raeta blong buk blong putum long foret blong buk. Ol printa ia oli no sas tumas blong pem.

Blong skanem mo printim ol notbuk
Bambae hemi isi blong skanem ol notbuk blong yu taem yu anfoldem blong ol pej oli stap wan wan. Taem yu skanem finis yu save sevem tugeta olsem PDF fael. Mo yu save printim aot olsem wan kopi blong hemia we yu bin raetem long eni inkjet o laser printa. Mifala yusum Epson DS-30 potable skana we hemi kasem paoa tru long wan USB taem hemi konek igo long komputa o laptop. Mifala yusum tu wan narafala skana we nem blong hem Canon Canoscan LiDE 120 we hemi yusum paoa tru long USB taem hemi konek long laptop. O yu save yusum camera long ol niufala smatfone blo tedei we igat ol app blong skan long hem wetem wan samting blong stanemap long hem olsem Modahaus Steady Stand Kit. Blo print mifala yusum Canon Pixma iP110 inkjet printa we hemi yusum batri blong kasem paoa. Be everi scanna ia oli mekem sem wok nomo.

Blong givimaot mo pasem kopi blong notbuk blong yu olbaot
Yu nid blong gat akses long intanet blong sharem notbuk we yu scanem onlaen. Mifala advaesem yu blong yusum WordPress.com (c.f. Reite village online library) blong aploadem mo postem ol infomesen blong notbuk blong yu olsem wan wei blong statem wan laebri blong yu onlaen o wan akaef. Yu save storem ol wok blong yu onlaen taem yu yusum Cloud storage seveses olsem Dropbox o Google Drive.

Wan narafala isi wei blong pasem ol notbuk blong yu hemi blong mekem kopi long ol PDF fael we yu bin skanem mo putum igo long ol flash draev or ol memori kad we oli save storem fulap samting.

Poao mo Laet
Ol camera, laptop, smatfone, printa mo skana oli nidim paoa suplae blong oli save wok. Taem se maen paoa supplae hemi no avaelebol imas gat ol bakap olsem ol batri mo jenereta blong yusum. Long PNG mifala yusum Goal Zero Yeti 150 sola jenereta wetam wan Nomad 200 Sola Panel blong givim paoa long ol laptop mo ol printa.
Mifala ibin yusum wan Power Traveller Solar Monkey Batri mo Jaja blong jajem ol camera mo fone.
Wetem ol devaes we oli kasem paoa tru long USB, mifala i yusum Anker Astro E7 25600mAh External Battery.

Mifala ibin traem yusum samfala sola laet long vilij mo mifala wantem advaesem yu blong yusum: Sun King Pro All Night mo Nokero N182 sola laet bulb.

Translation : Karen Tarisese.
The toolkit is licensed under Creative Commons.
Creative Commons Licence